पुनर्वास, २३ माघ

लगभग दुई दशकसे अपनो पहिचानके ताहीँ संघर्ष करत आओ रानाथारु समुदाय नेपालको आदिवासी जनजातिके सुचिमे अपनो पहिचान पाइगौ हए । माघ २३ गते संझाके ४ बजे नेपाल सरकारके प्रबक्ता मार्फत जा सुचि घोषण भओहए । जहे खुशियालीमे पुनर्वास नगरपालिका वडा न. ५ सिमरी गाउँ चोक कञ्चनपुरमे रानाथारु समुदाय औपचारिक रुपमे दिपावली एवम् शुभकामना कार्यक्रमके साथ स्वागत करि हए सरकारको रानाथारुको सुचिकरणको कदमके । शुभकामना कार्यक्रमको उद्घोषण करि रहए श्री तिर्थ राज राना ज्यू । कार्यक्रम श्री धोके रानाकी अध्याक्षतामे सम्पन्न भओ रहए ।

कार्यक्रममे विशिष्ट पहुना रहए पुनर्वास न. पा. वडा न. ७ के वडाध्याक्ष श्री राम दुलारे राना, वडा न. ८ के वडाध्यक्ष श्री सर्वन राना, वडा न. १० के वडाध्याक्ष श्री सुखदेव राना और तमानसे पत्रकार फिर रहए । कार्यक्रम रातको ९ बजे शुरुवात होएसे फिर बहुत नाचगान और धुमधामके साथ लगभग २०० आदमीकी सहभगितामे सम्पन्न भओ रहए करके तिर्थ राज राना बताई हँए । बे कहि रहए, आजसे हम रानाथारुकी नयाँ युग शुरु हुइगौ हए और जहेक मारे सगुनकी ताही गिनके १०१ मोमबत्ती पजारके दिपावली मनाए हएँ । कार्यक्रममे बहुतसे आदमी अपनी अपनी कहाइ धरि रहए । और खास करके बे सबएकी एकै बात रहए की अबसे सबए रानाथारु एक जुट हुइके अपनो अधिकारको माग करके बाके सहिसे सदुपयोग करन पणो और बाकि सँगसँगए पार्टि इकल्लो न देखके अपन समाजके विकास करनके ताहि शिक्षितसे लैके अशिक्षितसँग समन्व्य करन पणोमे सबएकी जोड रहए ।