खटिमा, उत्तराखण्ड । भारत-नेपाल रानाथारु मैत्री सम्मेलन २०२४ सम्पन्न भओ । सम्मेलन भारतको उत्तराखण्ड, खटिमाक कंजावाग मे शनिचरके रोज भव्यताके संग सम्पन्न भओ हए । सम्मेलनमे भारतके उत्तरप्रदेश लखिमपुरखिरी, उत्तराखण्ड उधमसिंह नगर, खटिमा और नेपालसे आएभए अतिथिनकाे प्रतिनिधित्वको उपस्थित रहए ।

कार्यक्रम राणाथारु संघके अध्यक्ष खटिमाके डिल्लु सिंह राणाके अध्यक्षतामे सम्पन्न भओरहए । कार्यक्रमके प्रमुख अतिथी राणाथारु परिषत खटिमाके अध्यक्ष दान सिंह राणा रहए । बे दिप प्रज्वलनके संग राणा प्रतापकी मुर्तिमे फुल अर्पण करके कार्यक्रमको उदघाटन करिरहए । बे कहि भारत(नेपालको सम्बन्ध सदियौ से चलत आएरहो रहए, जा के और घनिष्ट बनाएके लैजान पडो कहि ।

अइसि करके कार्यक्रमके विशिष्ट अतिथि डा देव सिंह राणा कहि नेपाल और भारतको सम्बन्ध रोटीवेटीको सम्बन्ध बताइ हए ।नेपाल रानाथारु समाजके केन्द्रिय उपाध्यक्ष कमल सिंह राना कहि नेपाल और भारतके रानाथारुवामे का उपलब्धि भइ अब हमके समिक्षा करके अग्गु बढन हए बताइ ।

कार्यक्रमको स्वागत मन्तव्य थारु जनकल्याण संस्था लखिमपुर खिरिके उपाध्यक्ष ओमप्रकाश राणा करिहए और कार्यपत्र प्रस्तुति नेपाल रानाथारु समाजके पुर्व अध्यक्ष पदम राना करिरहए । वे अपन प्रस्तुतिमे भारत(नेपाल रानाथारु मैत्री सम्मेलन २०२४ को आवश्यक्ता और उद्देश्यक बारेम प्रष्ट करिरहए ।

कार्यपत्रकी टिपणीकर्ता आदिवासि जनजाति सुदुरपश्चि प्रदेशके महासचिब राजकुमार राना बहुतसे प्रश्न तेर्साइ तहिक मारे जे सव बातको निर्कौल दुई देश विचको सम्बन्ध कैसे करके बनए बताई रहए । कार्यक्रममे संचालन नेपाल रानाथारु समाजके केन्द्रिय महासचिब भक्तराज राना करिरहए ।

कार्यक्रमसे १५ सदसिय तदर्थ अन्तराष्ट्रिय रानाथारु समाज नामक संस्था गठन करिहए । लोगो और झण्डाके बारेम पच्छु छलफल करन बताइहए । तदर्थ अन्तराष्ट्रिय समाजके संयोजमे डिल्लु राणा उत्तारखण्ड भारत , उपसंयोज ओमप्रकाश राना (up) और उपसंयोज पदम राना नेपालसे अइसि करके महासचिब राजकुमार राना नेपाल , कोषाध्यक्ष शिव राम राना (up), सचिब डा. देव सि राणा (uk) सदस्य श्रीमति लिला देवी राणा, जगन्नाथ राणा, जगत सिंह राणा(up) से नन्दलाल राना, बासमति राना, भक्तराज राना (Np)से और मलकीत सिंह राणा, राजेश सिंह राणा, राम किसोर राणा(uk) पदाधिकारी चयन करत कार्यक्रम सम्पन्न भओ रहए ।