दिनेश राना, धनगढी ।
उत्तरप्रदेश भारत लखिमपुर खिरी थारु क्षेत्र नझोटा गांवमे तिज उत्सव २०२३ भव्यताके साथ सम्पन्न भओ हए । सनिचरके रोज पुर्व प्रधान तथा नझोटा गांवके पधना रमा शंकर रानाके अध्यक्षतामे कार्यक्रम निभटो हए । कार्यक्रमकी प्रमुख पहुना नेपाल, कृष्णपुर नगर पालिकाकी उपप्रमुख द्रोपती राना रहएँ । बे कहि अपन भाषा संस्कृति बचान सबय जनि लागन पडो नेपालके इकल्लो नायकी जहाँ जहाँ हमर रानाथारु ददाभइया दिदीबहिनिया बैठत सबय लागन पडो तव मात्र आपनको पहिचान होबैगो बताई उपप्रमुख राना ।

आइसी करके कार्यक्रमके विशिष्ट पहुना गा्राम पञ्चायत पछली क्षिदियाके प्रधान रामनरेश राना कहि विस वर्ष बाद जा सालसे फिरसे शुरु भओ हए सामनको डोला डारन हमत भुलगैरहए जा साल शुरु भओ बहुत खुशी लागो कहिके बताइहए । ऐसीकरके थारु जनकल्याण संस्थाके अध्यक्ष छैलविहारी राना कहि अब भारत थारु क्षेत्रमे अपन लुप्त भई संस्कृतिके बचान अभियान शुरु भओ अव हरेक वर्ष जक निरन्तरता रहबैगो बताइहए ।

नेपालसे रानाकला संस्कृति संरक्षण मञ्च बेलाके अध्यक्ष महाविर राना कहि शुरुवात करन इकल्लो हए पच्छुत धिरे धिरे सब जनी सहयोग करन लागत हए बताई । रानाथारु डटकमके अध्यक्ष नन्दलाल राना कहि गत वर्ष जा क्षेत्रमे एक गांवमे डाेला डारी रहए पर जा साल तिन चार गांवमे डाेला डारेहए कहिके खबर मिलाे बताइ अाै रानाथारु दिदीबहिनियँनको दोस्रो बडो तिउहार तिज पर्वको शुभकामना दई हएँ ।
कार्यक्रममे तमान गाँवसे आई दिदीवहिनिया सामनको डोला डोलके तिजकी गित गाइके मनोरञ्जन कराइ रहएँ । गायक लक्ष्मी राना तिजके गितसे कार्यक्रमके अतिथी लोगनके बहुत मनोरञ्जन कराईहएँ ।

कार्यक्रमके स्वागत मन्तव्य थारु जनकल्याण संस्थाक उपाध्यक्ष ओमप्रकाश राना करिरहएँ कहेसे कार्यक्रमके संचालन नेपाल, धनगढी ११ बेला गांवकी सुमित्रा राना करिरहएँ ।