निवा राना, कैलाली ।
धनगढी उपमहानगर पालिका वडा नं. १५ उर्मा गांवमे डोलको उदघाटन भओ हए । डोला उद्घाटन कार्यक्रमकी प्रमुख अतिथी धनगढी उपमहानगर पालिकाकी उपप्रमुख कन्दकला राना रहए । आज सनिचरके रोज उपप्रमुख राना सामनको डोलक विधिवत उद्घाटन करीरहएँ और बे कहि हरेक जाति सामुदाय अपन भाषा संस्कृति संरक्षण तथा संवद्घनमे जोड दइरेहएँ ।

जा अधिकार हमर मौलिक अधिकार भितर पडत हए कहिके बताइहएँ उपप्रमुख राना, और कहि अन्य जाति सामुदायसे रानाथारु सामुदाय तिज पर्व फरक तरिकासे मनात हए । रानाथारु सामुदाय सामन महिनक उजियारीक तृतिय तिथीक दिन जा पर्व मनात हए । जा साल रानाथारु सामुदायको तिज पर्व भादौ २ गते पडो हए और तिजके दिन दिदीबहिनियाँ निरहार बर्त बैठके अपन भइया भतिजोक लम्बिउमरकी कामना करत नदियामे झुडकी पोहात हए बताई । उपप्रमुख राना कहि “अभय हमर युवा बहुतसे लागुऔषतमे फसें हए उनके उद्घार करन ताँहि धनगढी उपमहानगरपालिका तालिम सेन्टर खोलीहए । अइसीकरके महिलनके ताँहि विभिन्न मेलकी सिप सिखन तालिम कार्यक्रम लाईहए सब जनि सिप सिखन ताँहि फारम भरियो और स्वरोजगार बनियो बताइहएँ ।”

कार्यक्रममे धनगढी उपमहानगर पालिका वडा नं. १५ के वडा अध्यक्ष सुकदेव राना रानाथारु दिदीवहिनियँनको दुस्रो वडो तिउहार तिज पर्वको शुभकामना दइहएँ । कार्यक्रममे समाजसेवी रामसिह राना, शिवभोला विद्युत सहकारीके अध्यक्ष विनोद राना लगायत गाँवक महिला दिदीवहिनियाको उपस्थित रहए ।
कार्यक्रम शिव गंगा आधारभुत विद्यालयकी शिक्षक करुवा रानाक सभापतित्वमे भओ रहए कहेसे स्वागत मन्तव्य सोहि विद्यालयमे वालविकासमे पढानबाली शिक्षक रामबती राना करीरहएँ ।